ABŞ-nin İranla hərbi qarşıdurmaya nə qədər pul xərclədiyi bilindi

Amerika Birləşmiş Ştatları hökuməti 79 gündür davam edən İranla qarşıdurma çərçivəsində 85 milyard dollardan çox vəsait xərcləyib.

King.Az xəbər verir ki, bu barədə məlumat "Iran War Cost Tracker" portalının rəsmi saytında yerləşdirilib.

Layihə müəllifləri regiona göndərilən gəmilərdəki şəxsi heyətin saxlanılmasına sərf olunan vəsaitin həcmini və digər çoxsaylı hərbi xərcləri hesablayırlar. Məlum olub ki, bu göstərici Pentaqonun maliyyə bölməsinin rəhbəri əvəzi Culs Hörst tərəfindən daha əvvəl açıqlanmış 29 milyard dollarlıq məbləği təxminən üç dəfə üstələyir.

Xatırladaq ki, fevralın 28-də İsrailin müdafiə naziri İsrael Kats İsrail Müdafiə Qüvvələrinin İrana qabaqlayıcı zərbə endirdiyini açıqlayıb. Daha sonra ABŞ Prezidenti Donald Tramp ölkəsinin də İrana qarşı hərbi əməliyyatda iştirak etdiyini bildirib.

İran isə öz növbəsində İsrailə onlarla ballistik raket atıb. İsrail Müdafiə Qüvvələri atışları təsdiqləyib, ölkə daxilində sirenlər səslənib və hava hücumundan müdafiə sistemləri işə salınıb.

Martın 1-də İranın Ali Lideri Əli Xameneinin hücumlar zamanı öldürüldüyü bəyan olunub.

İran ABŞ-nin hərbi bazalarının yerləşdiyi qonşu ölkələrin əksəriyyətinə raket zərbələri endirib. Buna görə də həmin ölkələrdə hava məkanı müvəqqəti bağlanıb.

Həmçinin Hörmüz boğazından gəmilərin keçidində ciddi problemlər yaranıb.

Aprelin 8-də Donald Tramp Tehrana verdiyi ultimatumun vaxtının bitməsinə bir neçə saat qalmış Vaşinqtonun ikihəftəlik atəşkəslə razılaşdığını elan edib.

Daha sonra İslamabadda tərəflərin ilk görüşü keçirilib.

Aprelin 22-nə planlaşdırılmış ikinci görüş isə baş tutmayıb.