KİV: ABŞ Venesuela ilə əlaqəli onlarla tankeri saxlamaq niyyətindədir

ABŞ Administrasiyası Venesuela neft ticarəti ilə əlaqəli daha onlarla tankerin saxlanılması üçün məhkəmə qərarı istəyib.

King.Az xəbər verir ki, bu barədə "Reuters" mənbələrinə istinadən məlumat yayıb.

Məlumata görə, əsasən ABŞ-nin paytaxtı Vaşinqtonda rayon məhkəmələrində çox sayda mülki müsadirə tələbi irəli sürülüb.

Mənbələr aydınlaşdırıblar ki, hökumət gəmilərin saxlanılmasını yanvarın 9-da dayandırsa da, ABŞ neft daşınmasına icazə vermədiyi gəmilərə qarşı tədbirləri bərpa etməyə hazırdır.

Yanvarın 12-də Ağ Evin mətbuat katibi Kerolin Levitt jurnalistlərə bildirib ki, Vaşinqton Administrasiyası ABŞ hakimiyyət orqanlarının icazəsi olmadan Venesueladan yola düşən bütün tankerləri ələ keçirməyə davam edəcək.

"Reuters"in mənbələrinə istinadən verdiyi məlumata görə, yanvarın 7-də ABŞ Sahil Mühafizəsi Latın Amerikası sahillərində "Marinera" neft tankerini saxlayıb. Ağ Ev iddia edir ki, "Marinera" Venesuelanın kölgə donanmasının bir hissəsidir və ABŞ sanksiyalarını pozaraq qanunsuz olaraq neft daşıyıb.

Yanvarın 9-da ABŞ Sahil Mühafizəsi Vaşinqtonun sanksiya siyasəti çərçivəsində ələ keçirdiyi beşinci neft tankeri olan "Olina"nı nəzarətə götürüb.